КОВИЛЬ

Горнї ковильски православни, назаренски и католїцки теметов нєшка активни и находзи ше у Улїци Дьордя Бешлина, на концу улїчки з лївого боку, пред транспортним ґузлом за Нови Сад. На тим теметове ше од другей половки 19. вика по нєшка ховаю Серби православней вири. Єдна часц того теметова видвоєни и за други вироисповиданя (адвентисти, назарени, католїки и др.). Стари горнї ковильски теметов ше находзел у Улїци Лазе Костича. Спрам пренайдзених памятнїкох ше може утвердзиц же теметов зоз 18. вику.

Дольнї ковильски православни, назаренски и католїцки теметов ше находзи на концу Улїци Войводянских бриґадох, односно на концу Улїци Йовице Павлице. Тот теметов формовани на концу 19. и на початку 20. вику и активне и нєшка. На тим теметове ше од його наставаня по нєшка ховаю углавним Серби православней вири. Припаднїки других конфесийох менєй заступени, як наприклад Мадяре католїцкей вири и други. На тим теметову поховани тамбураш и композитор Васа Йованович.

Стари дольнї теметов ше находзел у Ґроблянскей улїци и трима ше же то найстарши православни теметов у Ковилю. На основи памятнїкох ше може утвердзиц же теметов исновал у 18. вику.

Єврейски теметов ше находзи на концу Улїци Войводянских бриґадох, односно на концу Улїци Йовице Павлице, 100-200 метери од Дольнього ковильского православного теметова. Судзаци по памятнїкох и вияви Бошка Брзича зоз Ковилю, теметов настал на початку прешлого вику. После Другей шветовей войни на тим теметове ше нє оконьчую хованя, та теметов запущени.

СТЕПАНОВИЧЕВО

Заєднїцки теметов (валалски теметов «Добричов брег») формовани 1926. року. Находзи ше сиверозаходно од валалу. Теметов заєднїцки за припаднїкох шицких конфесийох, ма каплїчку и оградзени є. Скорей формованя того теметова гражданє Степановичева свойо умартих ховали у сушедних местох.

ЛЕДИНЦИ

Стари Лединци

Теметов у Старих Лединцох ше находзи на линиї «Oскоруша», сиверозаходно од валалу. На основи памятнїкох може ше утвердзиц же ту теметов бул ище у 18. вику. Теметов ше хаснує и нєшка. По Другу шветову войну на тим теметове ше ховали лєм Серби православней вири, а после войни и припаднїки других конфесийох.

Нови Лединци

Нови Лединци настали у периодзе од 1945-1951. року, алє гражданє валала аж по 1977. рок свойо умартих ховали на Старим лединацким теметову. 1977. року формує ше Нови лединацки теметов з лївого боку драги пред уходом до валалу. На тим теметове ше ховаю шицки умарти з валалу, без огляду на националносц и виру.

БЕҐЕЧ

Єден заєднїцки теметов ше находзи при валалу, на концу Улїци Вука Караджича. Спрам нєобявеного писаного материяла Миленка Цвеїча зоз Беґечу, тот теметов штварта парцела на хторей ше оконьчую хованя. Перши теметова бул формовани на початку 18. вику и находзел ше єден километер заходно од валалу. Валал Беґеч ше 1828. року преселєл на восток, односно на место дзе ше и нешка находзи. Теметов ше тиж премесцел на другу парцелу, блїжей валалу. Треца парцела була обрацена ґу сиверу валала. Почим ше и вон попольнєл на початку того вика, формовани нєшкайши теметов.

БУКОВАЦ

Валалски теметов у Буковцу ше находзи помедзи Фрушкогорску улїцу и Партизанску драгу. Уход до теметова зоз партизанскей драги. Судзаци спрам найстарших памятнїкох, нєшкайши теметов настал у другей половки 19. вику. То сербски теметов, алє єст похованих и припаднїкох других народох и вироисповиданьох. Найстарши иснуюци памятнїк то памятнїк Милици Йованович од целовога каменя зоз 1880. року.

Перши теметов у Буковцу (на основи препатрунка и спознаня од старших Буковчаньох) ше находзел помедзи Карадьордєву и Войводянску улїцу, у нєпоштредней блїзкосци православней церкви. Ту тераз будинок месней заєднїци. Предпоставя ше же ту исновал теметов у 18. вику. З нагоди парцелованя портох за квартельни будинки, 150-200 метери восточно од нєшкайшого теметова, пренайдзени шлїди теметова, та ше може предпоставяц же ту була друга локация буковацкого теметова.

БУДИСАВА

Католїцки теметов ше находзи на концу Желєзницкей улїци. Трима ше же то найстарши теметов у Будисави и же настал после формованя валала, 1884. року. На тим теметове по 1905. рок ховани припаднїки шицких вироисповиданьох. Од 1905. року на Католїцким теметове ше ховаю лєм католїки и Українци грекокатолїцкей вири. Єврейски теметов у рамикох Католїцкого, на заходним концу парцели, алє памятни ознаки щезли и нє видлїви вецей.

Православни теметов ше находзи на початку Войводянскей улїци, з лївого боку драги до Качу. Теметов иснує од 1946. року. На тим теметове ше ховаю Серби православней вири, атеисти и адвентисти. Ту поховани и єден росийски ґенерал хтори умар пред Другу шветову войну. Реформатски теметов ше находзи у Улїци Доже Дєрдя и обрацени є ґу польом. Теметов настал 1906. року и активни є и нєшка. Реформати ше скорей ховали на Католїцким теметове.

Нємецки еванґелїцки теметов тиж у Улїци Доже Дєрдя. Трима ше же тот теметов настал 1906. року (виглєдованє Ґаламбош Ласла зоз Будисави). После Другей шветовей войни Нємци ше нє ховаю на тим теметове, хторе и з велькей часци и знїщене.

Мадярско-нововирски теметов ше находзи у Улїци Доже Дєрдя, обрацени є ґу польом и оддалєни є од Нємецкого и Реформатского теметова. Општинске поглаварство Будисави купело 1906. року 72 ари жеми за Назаренски теметов. На тим теметове ше ховаю найвецей Мадяри-назарени. То найменьши теметов у Будисави. Предпоставя ше же хованя почали 1907. року.

КАЧ

Сербски православни теметов ше находзи прейґа пруґи у нєпоштредней блїзкосци желєзнїцкей станїци. На основи найстарших памятнїкох може ше утвердзиц же теметов настал у другей половки 19. вика. На тим теметове поховани Джордже Стефанович, писатель и сотруднїк Вука Караджича.

Скорей того теметова исновал и стари теметов хтори паметаю стари Качанє. Вон ше находзел на початку Улїци Жарка Йовановича и у улїци Сави Малешева од числа 40 — 60. Трима ше же перши православни теметов у Качу бил у порти старей церкви, хтора була вибудована од древа и находзела ше 30 метери югозаходно од нєшкайшей церкви.

Мадярски католїцки теметов ше находзи сиверо-восточно од Нємецкого теметова. Трима ше же настало на початку 20. вика и нєшка ше находзи у добрим стану и добре ше отримує.

Нємецки еванґелїцки теметов ше находзи заходно од православного. Настал у першей половки 19. вику. После Другей шветовей войни у Качу нєт Нємцох. Теметов запущени.

Єврейски теметов ше находзел сиверозаходно од Нємецкого теметова. Трима ше же настало у першей половки 20. вика. На тим теметове ше од Другей шветовей войни вецей нє хова и знїщене є.

Назаренски теметов ше находзи поза Єврейского. Трима ше же настало у першей половки 20. вику. На нїм ше ховаю Серби-назарени.

ФУТОҐ

Православни теметов хтори ше находзи у Улїци Цара Лазара Футожанє волаю и Долнї православни теметов. Спрам податкох Сретена Боґдановича, пароха зоз Футоґа, на тим теметове ше ховало у половки 18. вику (1740). Теметов ше нєшка нє хаснує. Ту поховани двоме писателє: Лазар Кнежевич и Владан Стефанович.

Православни теметов у Улїци Раде Кондича Футожанє волаю и Горнї православни теметов. На основи зачуваних памятнїкох ше може заключиц же ше на тим теметове ховало у першей половки 18. вика, а дзепоєдни преданя нас наводза да вериме же теметов настал вельо скорей. Теметов и нєшка активни, гоч є преполнєти, преширени є по будованє Нового теметова.

На теметове 1884. року вибудована хижа хтора звалєна 1955. року. У тей хижи, попри квартеля гробара, исновали два хижи у хторих були два посцелї за оберацих хоротнїкох. Кед нє було оберацих хоротох, єдна хижа служела як дом за худобних.

Спрам рукописа Сретена Боґдановича, найстарши теметом, окрем теметова коло церкви, бул такволани Стари теметов, хтори ше находзи на виходу зоз Футоґу ґу Новому Саду. И нєшка иснує празни простор хтори ше вола „Стари теметов». Трима ше же ту исновал теметов ище у 17. вику.

Швабски теметов у Новим Футоґу ше находзи у Улїци Моше Пияде. Настало у першей половки 18. вика. Активне и нєшка. На тим теметове ше ховаю припаднїки католїцкого вироисповиданя: Нємци, Мадяре и други народи. На тим теметове похована Ана Кафка, Чехиня хтора була у зродстве зоз Францом Кафком.

Католїцке теметов у Улїци Цара Лазара ше находзи прейґа драги Дольнього православного теметова. На основи зачуваних памятнїкох и археолоґийних виглєдованьох, теметов датує з другей половки 19. вика и активне и нєшка. Утвердзене же ше ту з векшей часци ховали католїки, алє єсти и припаднїкох других вироисповиданьох. Скорей того теметова исновал стари католїцки теметов у Улїци Раде Кончара, дзе ше тераз находзи основна школа.

Швабски теметов ше находзи у Улїци Душана Кошутича, при Дому старих. На основи матичних кнїжкох умартих трима ше же настало у першей половки 18. вика. Тот теметов загашени 1948. року. На теметову углавним ховани Нємци католїцкей вири, а вери ше же на концу теметова ховани и Євреє. Теметов знїщени а памятнїки звалєни, зачувани лєм дзепоєден постамент.

ВЕТЕРНЇК

Заєднїцки теметов у Книнскей улїци формовани у половки 20. вику. Скорей 1950. року Ветернїчанє ше ховали у Футоґу на Католїцким и Православним, теметове, и єден и други ше находза у улїци Цара Лазара у Футоґу. На Ветернїцким теметове ховаю ше православни и католїки вєдно.