ТРАНДЖАМЕНТ И МАЮР

Стари католїцки теметов ше находзи у улїци Дунайскей дивизиї, на Транджаменту. Тот стари теметов, гражданє Петроварадина волаю Стари маюрски теметов. На початку 18. вику у Старим Маюру, коло церкви, находзел ше теметов за цивилох. Од 1748. року почина ше зоз хованьом на Транджаменту, долу Воєного теметова. На тим теметове ше коньча хованя и нєшка.

Попри католїкох ховаю ше и припаднїки других конфесийох. На тим теметове поховани: Яника Балаж 1923-1988, естрадни уметнїк, Йосип Зебетич (1838-1907) майор 70. Пешадийскей реґименти австрискей войски и Йосип Ханел (1838-1883), перши городоначалнїк Петроварадина.

Католїцки теметов тиж ше находзи у улїци Дунайскей дивизиї, на Транджаменту. Дзепоєдни го волаю Нови старомаюрски теметов. Настало на самим початку 19. вику бо стари теметов бул мали. На тим теметове ше и тераз оконьчую хованя. На нїм ше находзи и крипта заштрелєних партизанох у Вуковаре 19. октобра 1941. року. Воєни теметов ше находзи у улїци Дунайскей дивизиї, односно на Транджаменту. Настал у першей половки 18. вику. Скорей ше находзело при виходу зоз Беоґрадскей капури право, скорей драги хтора водзи ґу Твердинї. То старши теметов хтори настал на концу 17. вику и на нїм нєт нїяки видлїви шлїди.

Новемаюрски теметов ше находзи на концу Петроварадина, на виходу ґу Сримским Карловцом. Теметов настал за потреби Нового Маюра у другей половки 18. вику и активне по нєшка.

ЯКП „Лисє“ ше намага же би, шицки теметови о хторима ше стара, мали шицки нєобходни змисти. Остатнїх рокох ше досц уклада до ушорйованя инфраструктури, дзвиганє оградох и отримованя желєнїдла на теметовох.

На тих теметовох спрам податкох зоз 1962. року по тераз поховани коло 7800 умартих.